2024/2025-ci illər mövsümü üçün Azərbaycan Futbol Federasiyaları Assosiasiyası (AFFA) tərəfindən 15 yaşadək (U-15) qızlardan ibarət komandalar arasında keçirilən Azərbaycan çempionatının

 

Əsasnaməsi

 

1. Əsas müddəalar

 

1.1 Bu qaydalar liqada iştirak edən komandaların və təşkilinə cəlb olunmuş digər üzvlərin hüquqlarını, vəzifələrini və məsuliyyətini müəyyən edir.

 

2. Məqsəd və vəzifələr

 

2.1 AFFA U-15 Qızlar Liqası aşağıdakı məqsədlər üçün keçirilir:

• Qadınlar arasında futbolun təbliği və kütləviliyi;

• Qadın oyunçuların ustalıq səviyyəsinin yüksəldilməsi;

• Qadın oyunçuların klublarda hazırlanması və yığma komandalara cəlb olunması;

• Komandaların mövsümün yekununda tutduqları yerin müəyyən edilməsi.

 

3. İştirakçıların müəyyən olunması

 

3.1 AFFA U-15 Qızlar Liqasında klublara və komandalara iştirak hüququnu AFFA verir.                            

3.2 AFFA U-15 Qızlar Liqasında bir klub bir ad altında, bir komanda ilə təmsil oluna bilər.

 

4. Oyunçuların təvəllüdləri və liqalardakı iştirakı

 

4.1 AFFA U-15 Qızlar Liqasında 2010 və 2011-ci il təvəllüdlü oyunçular iştirak edə bilər.

4.2 AFFA U-15 Qızlar Liqasında 4 nəfər 2012-cü il təvəllüdlü oyunçu qeydiyyatdan keçirilə, onlardan yalnız 2 nəfəri meydanda ola bilər.

4.3 Sifariş vərəqəsində göstərilməyən və müvafiq lisenziya almayan komanda üzvləri oyunlar keçirilən zaman texniki zonaya buraxılmır.

4.4 Oyunçu yalnız qeydiyyatdan keçdiyi liqada çıxış edə bilər.

 

5. Qeydiyyat qaydaları, transfer, icarə və sifariş məsələləri

 

5.1 Qızlar Liqası komandaları 2024-25-ci il mövsümündən etibarən “Futbola Qoşul” onlayn qeydiyyat sistemi vasitəsi ilə oyunçu/məşqçilərini qeydiyyatdan keçirdikdən sonra, komandanı tərtib edir. Yeni tətbiq edilmiş “Lisenziya Kartlarına Bax”  funksiyası vasitəsi ilə komandasına baxıb sonra onu yükləyib/çap etməklə oyunun keçirilmə yerinə gətirməlidir. Lisenziya kartları plastik formada olmayacaq. Lisenziya kartları A4 formatda çap edilmiş formada yarış yerinə gətirilməsi birbaşa klub/komandanın məsuliyyəti olacaq. Protokol çap edilmiş A4 lisenziya kartları ilə birgə hakimə təqdim olunmalıdır. Hər hansı neqativ hal və ya şübhə olduqda hakim lisenziyanı və oyunçunu əvvəlcədən “Play Market”dən yüklədiyi “AFFA QR Code Scanner” vasitəsilə lisenziyanı yoxlaya bilər. Lisenziya yoxlanılan zaman oyunçu mövsümdə aktivdirsə skan edildikdə telefonun/planşetin ekranında əks olunacaq. Mövcud deyilsə yenə ekranda müvafiq yazı ilə (mövcud deyil və ya digər şəxsin məlumatı/şəkli ilə) əks etdiriləcək. Çap olunmuş A4 lisenziya formasında sənədin yüklənmə tarixi və mənbəyi (Futbola qoşul) göstərilir. Bu yeni funksiyaya liqasından asılı olmayaraq bütün klub/komandaların giriş imkanı olacaq. 

5.2 Hər bir oyunçu eyni zamanda yalnız bir klubda qeydiyyatda ola bilər. 

5.3 Oyunçuların statusu və transferi ilə bağlı olan mübahisələrə AFFA Oyunçuların Statusu və Transferi haqqında Əsasnaməyə müvafiq olaraq AFFA Oyunçuların Statusu və Transferi Komitəsinin Prosedur Qaydalarında göstərildiyi qaydada baxılır.

5.4 Hər oyunçu mövsüm ərzində ən çox iki klubda çıxış edə bilər.

5.5 Oyunçuların mövsüm ərzində əlavə sifarişi və transferləri aşağıda göstərilən qaydalar üzrə həyata keçirilməlidir:

a) Klubun əlavə sifariş etmək hüququna məhdudiyyət yoxdur.

b) Dövrələrarası fasilədə əlavə sifarişlərin sayına məhdudiyyət yoxdur. Sifarişlərin müddəti Qadınlar Liqasının təşkili şöbəsi tərəfindən əvvəlcədən rəsmi elan olunur.

c) Dövrələr bitdikdən sonra komandalara final mərhələsinə hazırlaşmaq və heyətini gücləndirmək məqsədilə tranfer pəncərəsinə icazə veriləcək. Tranfer pəncərəsinin müddəti Qadınlar Liqasının təşkili şöbəsi tərəfindən elan olunacaqdır. 

5.6 Transfer pəncərəsi dövründə edilən müraciətlərin qərarı cari mövsüm ərzində icra oluna bilər. Transfer pəncərəsindən əvvəl və ya sonra edilən məsələlərə bağlı qərar növbəti mövsümə şamil edilir. 

5.7 Bütün təqdim olunan sənədlərə görə klub və baş məşqçi məsuliyyət daşıyır.

 

6. Klub və ya komanda tərəfindən təqdim olunmuş oyunçuların saxta sənədləri

 

6.1 Mövsüm ərzində aşağıda göstərilən hallar sənədlərin saxtalaşdırılması kimi qəbul olunur:

a) Sifariş zamanı təqdim olunan aşağıdakı sənədlər saxta olarsa:

• Doğum haqqında şəhadətnamə

• Şəxsiyyət vəsiqəsi

• Ümumvətəndaş pasportu

• Tibbi arayış

• Elektron formatda təqdim olunan 3x4 ölçüdə fotoşəkil

• Müqavilə və s.

b) Bir oyunçunun digər oyunçuya məxsus olan elektron lisenziya ilə oyundan öncə, oyun zamanı, fasilədə oyuna buraxılma cəhdi və ya iştirakı;

c) Lisenziyasız oyunçunu oyundan öncə, oyun zamanı, fasilədə oyuna buraxılma cəhdi və ya iştirakı;

 

 

6.2 Yuxarıda göstərilən hallar aşkarlanarsa, bu cəzalar İntizam Komitəsi tərəfindən tətbiq oluna bilər:

a) Oyunçunun iştirak etdiyi bütün oyunların nəticələrinin ləğvi (texniki məğlubiyyət);

b) Oyunçunun lisenziyasının ləğvi;

c) Məşqçinin yarışda iştirak etmək üçün verilən lisenziyasının 12 aylıq ləğvi;

d) Məşqçinin məşqçilik lisenziyasının (Pro, A, B, C, D məşqçilik kateqoriyası) ləğvi;

e) Kluba və ya təmsil etdiyi quruma xəbərdarlıq məktubunun göndərilməsi;

f) Məşqçinin futbolla bağlı fəaliyyətdən 12 aylıq uzaqlaşdırılması və s.

 

7. İştirakçı komandanın öhdəlikləri

 

7.1 İştirakçı klublar və ya komandalar bu Əsasnamənin hər bir bəndinə riayət etməlidirlər.

7.2 İştirakçı klublar və ya komandalar FİFA tərəfindən tərtib olunmuş Fair Play prinsiplərinə riayət etməlidirlər. 

7.3 Klublar və komandalar onları təmsil edən hər hansı bir şəxsin (oyunçular, rəsmi şəxslər, azarkeşlər və s.) davranışına görə məsuliyyət daşıyırlar. Bir klubun məşqçisi digər klubun rəsmi heyətinə daxil ola bilməz və texniki zonada oyunlarında iştirak edə bilməz. Bu qayda pozularsa klub müvafiq qaydada cəzalandırılacaq.

7.4 Hər klub və ya komanda əlaqələndirici şəxsi təyin etməlidir və onu tələb olunan qaydada qeydiyyatdan keçirməlidir. Klub anketində əlaqə telefonu, elektron poçtun ünvanı (e-mail) və s. göstərilməlidir.

7.5 Bir klubun məşqçisi digər klubun rəsmi heyətinə daxil edilə bilməz və texniki zonada oyunlarda iştirak edə bilməz. Bu qayda pozularsa klub müvafiq qaydada cəzalandırılacaq. 

7.6 AFFA U-15 Liqasında iştirak edən komandalar ölkə xaricinə təlim-məşq toplanışına və ya beynəlxalq turnirlərə gedərsə və bu səfər Liqa təqvimi ilə üst-üstə düşərsə, klub 20 gün əvvəl  AFFA-ya yazılı məlumat verməlidir. Klubun təlim-məşq toplanışı ilə AFFA U-15 Liqasının təqvim oyunları üst-üstə düşdüyü halda, liqanın oyunları həmin liqada sifariş olunmuş oyunçulardan ən azı 4 nəfəri yığma komandalara ezam olunarsa təxirə salınacaqdır.

7.7 Nominal ev sahibi komanda oyunu 6 (altı) ədəd №5  top ilə təhciz etməlidir. 

 

Oyun forması ilə bağlı qaydalar:

 

7.11 AFFA U-15 Qızlar Liqasının komandalarının formalarının üzərində həmin Liqanın şevronu əks oluna bilər. 

7.12 AFFA U-15 Qızlar Liqasında iştirak edən yeni komandaların idman geyimləri AFFA tərəfindən verilir (Qeyd: Premyer Liqada iştirak edən klublara şamil edilmir). 

7.13 Forma seçimində üstünlük ev sahibi komandaya verilir. Komandalar öncədən oyun forması ilə bağlı razılığa gəlməlidirlər.

7.14 Qarşılaşan komandaların forma rəngləri eyni olduqda, protokolda nominal qonaq qismində qeyd olunmuş komanda AFFA tərəfindən təqdim olunmuş oyun gödəkçələrini geyinir. 

7.15 Oyunçunun oyun formasının kürəyində nömrəsi olmalıdır. Nömrə formadan tam seçilməlidir. Futbol corablarının altında qoruyucular (şitki) olmalıdır.

Qeyd: Oyunçunun oyun formasının kürəyində nömrəsi olmadığı təqdirdə komanda və ya klub ilk halda nəzərdə tutulan yol xərcinin 50% miqdarında cəzalandırılır. Bu hal təkrarlanacağı təqdirdə pul cəzası 100% miqdarına çatdırılır.

7.16 İştirakçı klub və ya komanda sponsorun loqosunu futbol maykasının üzərində əks etdirmək istədikdə bu haqda öncədən Qadınlar Liqasının təşkili şöbəsinə məlumat verməlidir.

 

8. Yarışın keçirilmə sistemi

 

8.1 Yarış seçmə mərhələ və final mərhələsindən ibarətdir. 

 

Seçmə mərhələ

 

8.2 AFFA U-15 Qızlar Liqasında ümumilikdə 14 komanda iştirak edir. AFFA U-15 Qızlar liqası bu mövsüm 3 regiondan – Paytaxt, Qərb və Şimal-Qərb zonasından ibarətdir. Paytaxt regionunda 6 komanda öz aralarında iki dövrədən ibarət olmaqla, Qərb və Şimal-Qərb regionunda isə hər regionda 4 komanda öz aralarında üç dövrədən ibarət olmaqla yarışacaqlar. Paytaxt regionundan 4 komanda, Qərb və Şimal-Qərb regionundan isə ümumi 4 komanda final mərhələsinə vəsiqə qazanacaqdır. 

8.3 Komandaların birinci dövrədə topladığı xallar növbəti dövrələrdə qüvvədə qalır.

8.4 AFFA U-15 Qızlar Liqasında hər bölgə üzrə iştirak edəcək komandaların sayı, oyunların təşkili üçün seçilmiş mərkəz şəhərlər və oyunların keçirilmə sistemi aşağıda göstərilmişdir:

 

Seçmə mərhələ
Region	Keçirilmə yeri	1-ci dövrədəki iştirakçıların sayı	2-ci dövrədəki iştirakçıların sayı	3-cü dövrədəki iştirakçıların sayı	Final mərhələsinə çıxan komandaların sayı
Paytaxt regionu	Bakı	6	6	-	4
Qərb zonası	Göygöl	4	4	4	2
Şimal-Qərb zonası	Zaqatala	4	4	4	2

 

8.5 Yarışın təqvimi Qadınlar Liqasının təşkili şöbəsi tərəfindən tərtib olunur. 

 

Qaliblərin müəyyən olunması

 

8.6 Dövrələrdə qaliblərin müəyyən olunması aşağıdakı kimidir:

a) Komandaların turnir cədvəlində tutduğu yerlər toplanmış xallara görə müəyyən olunur.

b) Qələbəyə görə 3 (üç) xal, heç-heçəyə görə 1 (bir) xal verilir. Məğlubiyyətə görə isə xal verilmir.

c) Komandaların xalları bərabər olarsa, turnir cədvəlindəki sıralama aşağıdakı göstəricilərə görə müəyyən olunur:

• Komandaların öz aralarında keçirdikləri oyunların nəticələrinə əsasən;

• Komandaların öz aralarında keçirdikləri oyunlarda vurulmuş və buraxılmış qolların sayına əsasən;

• Bütün oyunlarda vurulmuş və buraxılmış topların fərqinə görə;

• Bütün oyunlarda vurulmuş qolların sayına əsasən;

• Komandaların qələbə sayına əsasən;

• Ən az qırmızı və sarı vərəqələrə görə toplamış xalların fərqinə əsasən (sarı vərəqə 1     xal, qırmızı vərəqə 3 xal);

• Bütün göstəricilər eyni olarsa, yenidən komandalar arasında bir oyun keçirilir və nəticəyə əsasən turnir cədvəlində yer müəyyən edilir.

 

 

Final mərhələsi

 

8.7 Final mərhələsində 8 komanda iştirak edir. 

8.8 Final mərhələsi 1/4, 1/2 mərhələlərindən, III yer uğrunda oyun və final oyunundan ibarətdir.

8.9 Final mərhələsinin 1/4 final cütlükləri püşkatma yolu ilə müəyyən olunur.

8.10 1/2 final mərhələsində məğlub olan komandalar üçüncü yer uğrunda, qaliblər isə çempionluq uğrunda mübarizə aparır.

8.11 Final mərhələsindəki oyunlarda ev, səfər sistemi tətbiq olunacaqdır. Hər bir komanda iki oyun oynayacaq və oyunlar Qadınlar liqasının təşkili şöbəsinin müəyyənləşdirdiyi mərkəzləşdirilmiş meydanda keçiriləcək. İki oyunun nəticəsinə əsasən qalib müəyyənləşməzsə, birbaşa penaltilər seriyasında müəyyən edilir. Hər komanda ilkin olaraq 5 zərbə vurmaq hüququna malikdir. Əgər 5 zərbədən sonra qalib müəyyənləşməzsə, penalti zərbələri qalib müəyyənləşənə qədər davam etdirilir. 

 

 

9. Meydan

 

9.1 Oyunlar AFFA tərəfindən təsdiq edilmiş meydanlarda keçirilir.

9.2  Meydanda standartlara uyğun iki qapı olmalıdır. 

 

10. Oyunun təşkili

 

10.1 AFFA U-15 Qızlar Liqasının oyunları həftənin şənbə və ya bazar günləri keçirilir. İstisna hal kimi digər günlər Qadınlar Liqasının təşkili şöbəsi tərəfindən təyin oluna bilər.

10.2 Qadınlar Liqasının təşkili şöbəsi hər turdan öncə oyunların vaxtı ilə əlaqədar regional nümayəndəliyə və yaxud komandadakı əlaqələndirici şəxsə məlumat verir. Təqvimə uyğun olaraq adı birinci yerdə olan komanda ev sahibi hesab edilir. 

10.3 Hər bir klub və ya komandanın əlaqələndirici şəxsi ay ərzində hər hansı turun ilk oyununun başlanmasından ən azı 4 gün öncə oyunun keçirilmə yeri və saat dəyişikliyi ilə bağlı müraciət edə bilər. Müraciətlər yalnız yazılı şəkildə və səbəbi göstərilmək şərti ilə qəbul olunacaqdır. 

10.4 Komandalar oyunun başlanmasından 60 dəqiqə öncə oyun keçirilən meydana gəlməlidirlər. Oyun başlayan vaxta klub və ya komanda meydanda olmazsa aldığı yol xərcinin 50% miqdarında cəzalandırılır. Təyin olunan vaxtdan sonrakı 20 dəqiqə ərzində komanda meydanda olmadığı təqdirdə pul cəzası 100%-ə çatdırılır və oyunun protokolu bağlanılır. (Fors-major hallarına rast gəlinərsə, komanda bu haqda təcili Qadınlar Liqasının təşkili şöbəsinə məlumat verməli və Qadınlar Liqasının təşkili şöbəsi bu halları araşdırıb müvafiq qərar verməlidir) 

10.5 Elektron lisenziyalar komandalar tərəfindən çap olunub hakimə təqdim olunmalıdır. Oyundan əvvəl lisenziyalar oyunun  hakiminə təqdim edilmədiyi halda hakim oyunu başlamamalıdır. 

10.6 AFFA U-15 Qızlar Liqasında bütün komandalar AFFA tərəfindən nəqliyyat xərcləri ilə təmin olunur (Peşəkar futbol komandalar istisna olmaq şərti ilə).

10.7 AFFA U-15 Qızlar Liqasında mərkəzləşdirilmiş yerlərdə keçirilən oyunların stadionunun icarə haqqı AFFA tərəfindən ödənilir.

10.8 Təcili Tibbi Yardım maşını və ya həkim briqadası oyundan 15 dəqiqə əvvəl meydançanın ərazisində olmalıdır (Təcili Tibbi Yardım və ya həkim briqadası olmadan baş hakim oyunu başlaya bilməz).

10.9 Oyunlara ev sahibliyi edən stadion oyun zamanı təhlükəsizliyə görə məsuliyyət daşıyır. Oyuna ən azı 15 dəqiqə qalmış meydanın ərazisini polislə təmin etməlidir (Qeyd: Paytaxt zonasında oyunlara ev sahibliyi edən stadionu polislə AFFA təmin edir). Polis olmadan baş hakim oyunu başlaya bilməz.

11. Oyun qaydaları

 

11.1 Bütün oyunlar FİFA oyun qaydalarına əsasən keçirilir:

• Oyunlar iki hissədən ibarətdir. Hər hissə 35 (otuz beş) dəqiqədir.

• Hissələrarası fasilə isə 10 (on) dəqiqədir.

11.2 Texniki zonada tütün məmulatları istifadə etmək, həmçinin elektron siqaret çəkmək qadağandır.  

 

12. Oyun zamanı oyunçuların əvəzlənməsi

 

12.1 Oyunlarda əvəzetmə oyunun protokolunda adları göstərilmiş oyunçularla həyata keçirilir. Hər komanda oyun zamanı  3 dəfə saxlamaq şərtilə (hissələrarası fasilədə olan əvəzetmə 3 dəfə saxlanmaya daxil deyil) yalnız 5 əvəzetmədən istifadə edə bilər. 

12.2 Meydana daxil olmağa hazırlaşan oyunçu birinci yan xətt hakimə lisenziya ilə yaxınlaşmalıdır. Əvəzetmə zamanı ehtiyat hakim meydanı tərk edən və meydana daxil olan oyunçuların nömrələrini tabloda göstərməlidir.

12.3 Oyun ərzində ehtiyat oyunçular isinmə hərəkətləri etmək üçün texniki zonanı tərk edə bilər. Oyunun baş hakimi oyundan öncə isinmə hərəkətləri üçün təyin olunmuş yerləri komandalara göstərir. İsinmə hərəkətlərini 5 oyunçu eyni anda edə bilər. 

 

 

12.4  Yalnız ehtiyat oyunçu kimi göstərilən 7 nəfər oyun zamanı meydana daxil ola bilər. Oyun zamanı əvəzlənmiş oyunçu meydana bir daha qayıda bilməz. 

  

                                                                     

13. Oyunun protokolu

 

13.1 2024-25-ci il mövsümündə AFFA U-15 Qızlar Liqasında elektron “FCMS – Yarışların İdarəetmə Sistemi” tətbiq olunacaq. 

13.2 Oyun protokoluna 18 oyunçunun (11 əsas, 7 ehtiyat) adı və soyadı yazılır.

13.3 Oyunun başlamasına 75 dəqiqə qalmış oyunun protokoluna nömrələri göstərilməklə oyunçuların adları, soyadları yazmalı və müvafiq oyunun hakiminin elektron poçt adresinə göndərilməlidir. Protokolda hər hansı bir dəyişiklik olduğu halda, oyunun hakiminə oyun başlayana kimi çap olunmuş protokol oyunçuların elektron lisenziyaları ilə birlikdə təqdim edilməlidir. Komandalar oyunun başlanmasına ən azı 30 dəqiqə qalmış oyun keçirilən meydana gəlməlidirlər. Təqvimə uyğun olaraq adı birinci yerdə dayanan komanda ev sahibi hesab edilir.

13.4 Protokoldakı oyunçunun  adı, soyadı, təvəllüdü və formasında əks olunmuş nömrəsi göstərilməlidir. Həmçinin oyun zamanı ehtiyat skamyada oturan rəsmi şəxslərin adları, soyadları və vəzifələri yazılmalıdır. Elektron protokolun çap olunmuş forması hər iki komandanın rəsmi şəxsləri tərəfindən imzalanmalıdır.

13.5 İlk 11-lik kimi protokolda göstərilən oyunçular oyuna başlayır. Oyunçuların futbol formalarında göstərilən nömrələr, protokoldakı nömrələrlə uyğun gəlməlidir. 

13.6 Hakimlər briqadası oyundan öncə protokolda göstərilən bütün şəxslərin lisenziyalarını yoxlayır. Yarışda iştirak edən komandanın hər bir üzvü AFFA tərəfindən tərtib olunmuş lisenziyaya malik olmalıdır. Lisenziyada aşağıdakılar əks olunur:

• Ad;

• Soyad;

• Ata adı;

• Təvəllüdü;

• Klubu;

• Fotoşəkil;

• İdman;

• Rol; 

• Mövsüm; 

• AFFA ID (Lisenziyanın nömrəsi). 

13.7 Əgər oyunun protokolu tələb olunan vaxtda hakimlərə təqdim olunmazsa, bu məsələyə AFFA-nın müvafiq mövsüm üçün təsdiq edilmiş İntizam Məcəlləsi və bu Əsasnaməyə müvafiq olaraq baxılacaqdır.

13.8 Yalnız ehtiyat oyunçu kimi göstərilən 7 nəfər oyun zamanı meydana daxil ola bilər. Oyun zamanı əvəzlənmiş oyunçu meydana bir daha qayıda bilməz.

13.9 Oyunun başlaması üçün hər komandanın əsas heyətində minimum 7 nəfər oyunçu olmalıdır. Əks halda oyun baş tutmamış sayılır, komanda üçün nəzərdə tutulan nəqliyyat xərcinin 100% miqdarında cəzalandırılır  və oyunun protokolu bağlanılır. 

13.10 Oyun zamanı zədələnmə və s. kimi hallar baş verərsə,oyunçu dəyişikliyi üçün ehtiyyat oyunçu olmazsa  komanda 7 nəfər ilə (4 nəfər azlıqda) oyuna davam edə bilər. 6 nəfər oyunçu ilə oyuna davam edilə bilməz.

 

 

14. Oyun protokolunda oyunçu adlarının yer dəyişməsi

 

14.1 Hər iki komanda tərəfindən oyun protokolu FCMS-da yerləşdirildikdən sonra oyunçuların adlarının protokolda dəyişilməsi qadağandır. İstisna hallar aşağıdakılardır: 

• Əgər ilk 11-likdə göstərilən hər hansı oyunçunun oyundan öncə fiziki durumu ilə bağlı problem aşkarlanarsa, o zaman 7 ehtiyat oyunçudan biri ilk 11-liyə daxil oluna bilər. Bu halda oyun ərzində komandanın 7 əvəzetmə ehtiyatı öncədən göstərildiyi kimi qüvvədə qalır.

• Əgər oyun protokolunda göstərilən 7 ehtiyat oyunçudan hər hansı birinin fiziki durumu ilə bağlı problem aşkarlanarsa, o zaman protokolda göstərilməyən, lakin lisenziyası olan digər bir oyunçu ilə əvəzlənə bilər.

 

 

15. Oyunlarda iştirakdan imtina və oyunların dayandırılması

 

15.1 Əgər komanda oyunda iştirak etməkdən imtina edərsə AFFA-nın İntizam Komitəsi tərəfindən texniki məğlubiyyət verilə bilər. Bu hal 3 dəfə təkrarlanarsa komanda İntizam Komitəsinin qərarına əsasən turnirdən kənarlaşdırılır. 

15.2 Səbəbindən asılı olmayaraq (yaş limitinin pozulması; yetər say olmadığı halda; oyuna gəlmədiyi halda və s.) çempionat ərzində 3 texniki məğlubiyyət alan komanda avtomatik turnirdən kənarlaşdırılır.

15.3 Liqadan hər hansı bir səbəbə görə kənarlaşdırılan komanda növbəti mövsüm liqaya buraxılmaya bilər.

15.4 Əgər oyun başlandıqdan sonra hər hansı bir səbəbə görə dayandırılarsa, Qadınlar Liqasının təşkili şöbəsi klub və ya komandalarla razılaşdırdıqdan sonra oyunu başqa tarixə keçirə bilər. Oyun dayandırıldığı vaxtdan və həmin ana qədər olan nəticə ilə davam etdiriləcəkdir. 

 

 

16. Hakimlik və İnspeksiya

 

16.1 AFFA U-15 Qızlar Liqasının oyunlarını AFFA-nın Hakimlər Komitəsi tərəfindən təyin edilmiş hakim idarə edir və hakimlik FİFA qaydaları əsasında həyata keçirilir. Hakimlər Komitəsi  AFFA U-15 Qızlar Liqasının oyunlarına 3 nəfərdən ibarət hakim təyin edir. 

16.2 Hakim oyunun başlanmasından 60 dəqiqə öncə gəlib, meydanın oyuna hazırlıq vəziyyətini yoxlamalıdır. 

16.3 Hakim oyunun keçirilməsinə cavabdeh olan şəxslərdən tələb etməlidir ki, onlar meydança ilə bağlı olan nöqsanları oyunun başlanmasına kimi həll etsin. 

16.4 Protokollar oyun bitdikdən sonra növbəti günü saat 11:00 qədər AFFA-nın Qadınlar Liqasının təşkili şöbəsinə elektron poçt vasitəsilə göndərilməlidir. 

16.5 Baş hakim oyunun elektron protokoluna adı daxil edilmiş oyunçuların sənədlərini mütləq yoxlamalıdır. Oyuna sifariş edilmiş oyunçuların və iştirakçıların çap olunmuş elektron lisenziyaları zərurət olduqda oyunun sonunadək baş hakimdə qala bilər. 

16.6 Komandalar tərəfindən hakimlərin dəyişdirilməsi ilə əlaqədar xahiş qəbul olunmur.

 

17. AFFA intiza qərarları

 

17.1 Bütün vərəqələrə İntizam Komitəsi tərəfindən baxılır. Oyunçular İntizam Komitəsinin qərarları əsasında cəzalandırılır. Oyun zamanı və oyundan sonra baş verən insidentlərlə bağlı bütün qərarları İntizam Komitəsi qəbul edir. İntizam Komitəsinin qərarları affa.az saytında dərc edilir və cəzalı oyunçuların meydanda olub olmamasına görə məsuliyyəti komanda daşıyır.  

17.2. İntizam Komitəsi tərəfindən sanksiyalar AFFA-nın müvafiq mövsüm üçün təsdiq edilmiş İntizam Məcəlləsində və ya bu Əsasnamədə göstərildiyi təqdirdə tətbiq olunur.

 

 

Sarı və qırmızı vərəqələr

 

17.3 Sarı və qırmızı vərəqələrə görə məsuliyyəti komanda və ya klub daşıyır.

17.4 Qırmızı vərəqə alan oyunçu İntizam Komitəsinin çıxaracağı qərara uyğun olaraq, komandanın keçirəcəyi müəyyən olunmuş sayda növbəti oyunu (oyunları) buraxır.

17.5  Sarı vərəqələr mərhələdən asılı olmayaraq öz qüvvəsində qalır. 

17.6 Cari mövsüm ərzində mərhələdən asılı olmayaraq dörd sarı vərəqə alan oyunçu növbəti turu buraxmalıdır. 

17.7 Liqanın hər hansı mərhələsində alınmış qırmızı vərəqələr öz qüvvəsində qalır.

17.8 Baş tutmayan oyundan sonra İntizam Komitəsi tərəfindən texniki məğlubiyyət alan komandanın həmin oyunu buraxmalı olan oyunçuların cəzaları qüvvədə qalır. 

17.9 Baş tutmayan oyundan sonra İntizam Komitəsi tərəfindən texniki qələbə alan komandanın həmin oyunu buraxmalı olan oyunçuları cəza çəkmiş hesab olunur.

17.10 Oyunçu qırmızı vərəqə alıbsa və İntizam Komitəsi növbəti oyuna qədər bu barədə qərar çıxarmayıbsa, həmin oyunçu qərar çıxana qədər oyunları buraxmalıdır.

17.11 Alınan bütün sarı və qırmızı vərəqələrə görə öhdəlik klubun üzərinə düşür (turu buraxmalı olan oyunçu oyunda iştirak edərsə məsuliyyəti komanda daşıyır).

17.12 Oyunçunun müəyyən liqada aldığı cəza digər liqaya şamil olunmur. 

 

 

18. Protestlər

 

18.1 Protest verən baş məşqçi oyundan dərhal sonra bu barədə baş hakimi xəbərdar etməlidir. Protestin verilməsi oyunun protokolunda öz əksini tapmalıdır. Oyunun gedişində ciddi münaqişələr baş verərsə, oyunun baş hakimi AFFA-nın Qadınlar Liqasının təşkili şöbəsinə öz izahatlarını göndərməlidirlər. Protest komandanın baş məşqçisi tərəfindən imzalanmalı, 24 saat ərzində AFFA-nın Qadınlar Liqasının təşkili şöbəsinə çatdırılmalıdır.  

18.2 Protestlərə aşağıdakı hallarda baxılmır:

• 11 metrlik cərimə zərbələrinin təyin olunması

• 11 metrlik cərimə zərbələrinin təyin olunmaması

• Oyundankənar (off-side)  vəziyyətin müəyyən edilməsi barədə

• Topun qapı xəttini keçib-keçməməsi barədə

18.3 İntizam Komitəsinin qərarlarından şikayət vermə qaydası Apellyasiya Arbitraj Tribunalının Əsasnaməsinə uyğun olaraq müəyyən olunur.

 

 

 

 

19.1 Liqada ilk 3 yeri tutan komandaların oyunçuları və baş məşqçiləri müvafiq olaraq qızıl, gümüş və bürünc medallarla və AFFA-nın diplomları ilə təltif olunur.

19.2 Mövsümün sonunda liqanın bombardiri (ən məhsuldar oyunçusu), ən yaxşı oyunçu və ən yaxşı qapıçısı seçilir və mükafatlandırılır.

 

 

20. Mətbuat

 

20.1 Oyunun işıqlandırılması üçün (TV-lər, həmçinin qəzet və saytlar tərəfindən baş məşqçi, futbolçular, klub rəsmilərindən müsahibələrin hazırlanması üçün video və foto çəkilişlərin aparılması) mətbuat nümayəndələrinə ev sahibi komanda tərəfindən müvafiq şərait yaradılmalıdır. 

20.2  Oyundan sonra müraciət olunduqda hər hansı oyunçu, məşqçi və klub rəsmisindən mətbuat nümayəndələri müsahibə almaq hüququna malikdirlər.

 

 

21. Stadion və iştirakçı komandaların təminatı

 

21.1 Mövsüm ərzində AFFA tərəfindən stadionlar aşağıdakı bəndlər üzrə təmin olunur:

a) Top №5 (təsdiq edilmiş sayda);

b) Qapı toru;

c) Oyun gödəkçələri (jilet);

d) İcarə haqqı.

21.2 Mövsüm ərzində AFFA tərəfindən müəyyən olunmuş komandalar aşağıdakı bəndlər üzrə təmin olunur (Qeyd: Premyer Liqada iştirak edən klublara şamil edilmir):

a. Top №5 (təsdiq edilmiş sayda);

b. Nəqliyyat xərcləri (təsdiq edilmiş miqdarda);

     c.   Oyun formaları 

 

22. Reklam lövhələri və aksiyaları

 

22.1  Meydanda tələb olunarsa reklam lövhələri yerləşdirilməlidir.

 

23. Cərimələrin tətbiqi

 

23.1 AFFA tərəfindən komandalara oyunlar üçün nəqliyyat vasitələri, nəqliyyat xərcləri və komanda məşqçiləri üçün xidmət haqqı təyin olunur (peşəkar komandalar istisna olmaq şərtilə). Komandaların oyuna gəlmədiyi, yaş limitinin pozulması,  yetərsay olmadığı və bir sıra digər səbəblərdən oyunlar baş tutmadığı təqdirdə İntizam Komitəsinin müvafiq qərarına əsasən nəqliyyat xərcləri və ya xidmət haqqından cərimə tətbiq oluna bilər. Cərimələrin tətbiqi aşağıdakı kimidir: 

a) Səbəbindən asılı olmayaraq (yaş limitinin pozulması; yetər say olmadığı halda; oyuna gəlmədiyi halda və s.) texniki məğlubiyyət alan komanda nəqliyyat xərcinin  (nəqliyyat xərci olmayan komandanın məşqçisinin xidmət haqqının) 100% miqdarında cəzalandırılır;

b) Oyuna gecikmə halı baş verərsə, (təyin olunan vaxtdan sonrakı 20 dəqiqə ərzində komanda meydanda olmadığı təqdirdə və ya ev sahibi komanda oyunun vaxtında başlamasına şərait yarada bilməzsə: təcili tibbi yardımla təmin etməməsi səbəbilə və s.) komanda nəqliyyat xərcinin (nəqliyyat xərci olmayan komandanın məşqçisinin xidmət haqqının) 100% miqdarında cəzalandırılır;

c) Oyunçunun oyun forması qaydasında olmadığı təqdirdə (formasının kürəyində nömrəsinin olmaması; futbol corablarının altında qoruyucular (şitki) olmaması və s. hallarda) komanda məşqçisinin nəqliyyat xərcindən (nəqliyyat xərci olmayan komandanın məşqçisinin xidmət haqqının) ilk halda 30%, bu hal ikinci dəfə təkrarlanarsa 50% tutulacaq. Bu hal 3-cü dəfə təkrarlandığı təqdirdə həmin qaydaları pozan komanda çempionatdan kənarlaşdırılacaq.

 

24. Yekun müddəalar

 

24.1. Bu Əsasnamə, FIFA, UEFA və AFFA-nın nizamnamələrinə və digər sənədlərinə uyğun şəkildə hazırlanmışdır.

24.2. Bu Əsasnamə, imzalandığı tarixdən qüvvəyə minir və 2024/2025-ci il mövsümü üzrə qüvvədə olacaqdır.

24.3. Əsasnaməyə dəyişikliklər və əlavələr yalnız AFFA-nın İcraçı vitse-prezidenti tərəfindən edilə bilər.

24.4. Bu Əsasnamə ilə FİFA, UEFA-nın müvafiq qaydaları, tövsiyyələri və bununla bağlı digər sənədlər arasında əhəmiyyətli ziddiyət olduqda FİFA və UEFA tərəfindən qəbul edilmiş sənədlər üstün qüvvəyə malikdir.